ल क्याम्पसमा ओलीले चटपटे खाए, २० रुपैंयाको सट्टा ९ हजार तिरे

वैशाख २६ - नेकपा एमालेका अध्यक्ष केपी शर्मा ओलीले २० रुपैंया पर्ने चटपटेलाई ९ हजार रुपैंया तिर्नुभएको छ । चटपटेवालाले उहाँलाई ठगेका होइनन् । उहाँ आफैंले २० रुपैंयाको सट्टा ९ हजार दिनुभएको हो । चटपटेलाई ९ हजार रुपैंया तिर्नुको पनि आफ्नै कारण छ ।

भूकम्प पीडितलाई राहत र सहयोग संकलन गर्ने क्रममा एमालेको विद्यार्थी संगठन अनेरास्ववियुले ल क्याम्पसमा नयाँ अभियान सुरु गरेको छ । तीन दिनदेखि अखिलका विद्यार्थीले क्याम्पसको गेटमा चटपटे बेच्न सुरु गरेका छन् । चटपटे बेचेर संकलन भएको रकम भूकम्प पीडितलाई दिने उनीहरुको योजना छ । 

शनिबार बिहान ल क्याम्पसमै अनेरास्ववियुले गरेको कार्यक्रममा एमाले अध्यक्ष ओली उपस्थित हुनुभएको थियो । क्याम्पसभित्र पस्ने क्रममा उहाँले अखिलका विद्यार्थीले थालेको अभियानलाई समर्थन जनाउनुभयो । उनीहरुको काममा उत्साह थप्नेगरी चटपटे किन्नुभयो र भूकम्प पीडितको सहयोगको लागि ९ हजार रुपैंया दिनुभयो । 

‘उहाँले हामीलाई उत्साह बढाउनेगरी सहयोग गर्नुभएको हो’ अनेरास्ववियुकी महासचिव राधिका खतिवडाले भन्नुभयो, ‘उहाँको यो सहयोगले हामीलाई अझै प्रेरणा मिलेको छ ।’
अखिलले भूकम्प प्रभावित बिभिन्न १२ जिल्लामा स्वयंसेवक टोली पनि परिचालन गरेको छ । हरेक टोलीमा ९/९ जना सहभागी छन् ।

उनीहरु जिल्ला कमिटीको सहयोग लिएर भूकम्पका कारण भत्किएका विद्यालय भवनमा अस्थायी टहरा बनाउने खतिवडाले जानकारी दिनुभयो । उनीहरु महिना दिनसम्म जिल्लामै बस्छन् ।जिल्ला जान लागेका अखिलका टोलीलाई बिदाई गर्दै पार्टी अध्यक्ष ओलीले प्रचारभन्दा मेहनतका साथ काम गर्न निर्देशन दिनुभयो । 

-उज्यालो