आशिष ठकुरी
बैशाख ७, धार्के — धादिङको गोगनपानीमा रहेको विद्युत ट्रान्सफर्मर बिग्रीएको एक हप्ता बितिसक्दा पनि मर्मत नहुँदा रेडियो सञ्चालनमा फेरी समस्या आएको छ । गोगनपानी ९ ठुलोडाँडामा रहेको विद्युत ट्रान्सफर्मर गत आईतबार नै मर्मतका लागि ललितपुरको बालकुमारीे लगिए पनि विद्युत प्राधिकरणको लापरवाहिका कारण मर्मतमा ढिलाई हुँदा धादिङको नौविसे १ धार्के स्थित रेडियो राजमार्गको नियमित प्रसारणमा समस्या आएको हो । गोगनपानी ४ रानीमालामा रहेको रेडियोको प्रसारण केन्द्रमा विद्युत सेवा बन्द भएपछि गत महिना पनि एक हप्ता रेडियोको नियमित प्रसारणमा समस्या आएको थियो ।
रेडियोको प्रसारण केन्द्रमा सौर्य विद्युत जडान गरेकाले दिउँसोको समयमा रेडियो प्रसारणमा कुनै समस्या नभएपनि विहान र बेलुकी २/२ घण्टा भने समस्या हुँदै आएको रेडियो राजमार्गका अध्यक्ष नारायण सुबेदीले बताउनुभयो । धादिङको गोगनपानी र थाक्रेको केहि भाग सहित नौविसे, केवलपुर, जिवनपुर र छत्रेदेउराली गाउँविकास समितीमा अहिले दैनिक ८ घण्टा लोडसेढिङ हुँदै आएको छ । जिल्लाको अन्य गाविस र नगरपालिकामा भने दैनिक २ घण्टा मात्र लोडसेढिङ हुने गरेको छ ।
चट्याङ र हावाहुरीका कारण बिग्रीएको २५ के भि ए क्षमताको ट्रान्सफर्मर मर्मत भएर भोलि मँगलबार मात्र जडान हुन सक्ने विद्युत प्राधिकरण धार्के प्र शाखाका प्रमुख केदार प्रसाद लामिछानेले बताउनुभयो । विद्युत प्राधिकरणको आफ्नै मर्मत केन्द्र लैनचौरमा मर्मत गर्न निकै ढिला गर्ने भएकाले निजी मर्मत केन्द्र बालकुमारीमा लगिएको लामिछानेले बताउनुभयो । चट्याङले ट्रान्सफर्मरको एउटा फेज जलेको र बाँकी २ वटा फेजले बत्ति बल्ने भए पनि मिल तथा कारखानाहरु नचलेकाले मर्मत गर्न पठाईएको प्राधिकरणले जनाएको छ । विद्युत अवरुद्घ हुँदा गोगनपानीको वडा नम्बर ४ र ९ का एक सय भन्दा बढि घरधुरीका स्थानिय अँध्यारोमा बस्न बाध्य भएका छन् । लामो समय विद्युत आपुर्ति बन्द भएपछि दैनिक कामकाज गर्न पनि समस्या भएको स्थानिय सन्तुमाया तामाङले बताउनुभयो ।
नौविसे, जिवनपुर, केवलपुर, गोगनपानी, थाक्रे तसर्पु भुमेस्थान गाविस हेर्ने विद्युत प्राधिकरण शाखाको उद्योग, कलकारखाना बाहेक साँढे नौ हजार ग्राहक रहेका छन् ।
